TAONG MILAGROSO

Salin ng tula ni Philip Larkin (1922-1985) 

Ang pagtatalik ay nagsimula 

Taong sanlibo’t siyam na raan animnapu’t tatlo 

(Medyo napag-iwanan na ako) 

Sa panahong ang pagbawal sa “Chatterley” ay patapos na, 

At unang album ng Beatles ang nauuso. 

Hanggang noon, ito lang ang naatim: 

Hirit-tawaran kumbaga, 

Singsing na pilit makuha, 

Kahihiyang nagmula sa edad labing-anim 

At sa lahat ay nakahawa. 

Walang anu-ano, pagtatalo’y lumubog na: 

Pawa tayong iisa ang naramdaman, 

Bawat buhay iisa ang dinaraanan, 

Henyong pagbasag ng alkansiya, 

Walang katalu-talong paligsahan.  

Kaya’t buhay ay di na bubuti pa sa 

Taong sanlibo’t siyam na raan animnapu’t tatlo 

(Kahit talagang napag-iwanan na ako) 

Sa panahong ang pagbawal sa “Chatterley” ay patapos na, 

At unang album ng Beatles ang nauuso.